水藍天岸......收樓遇到的難題

上星期終於收了樓啦，第1次睇都好開心，好興奮﹗
不過，星期三搵左驗樓師及工程師上去檢查，唉﹗而家整頭好想喊呀，好頭痛﹗
當日阿詹生(驗樓師)發現了幾個問題：
一、客廳牆身不單有無數處列行，而且有嚴重既滲漏問題，因為牆身有部分地方開始有滲漏、起卜，詹生話應該係外牆石屎問題，就算屋內點樣重新整都應該無用，一定要係出面搭棚架維修，否則一遇大雨，牆身一定無梗。
二、露台及窗台外牆都有空心磚，要更換
三、窗台外漏了用玻璃膠，大雨又會滲水
其實，其他地方都有問題，不過容易整，但係滲水問題就似好嚴重同麻煩咁，已經叫左香港興業跟進，不過我驚佢地是是但但，雖然之後有一年滲漏補養，但係要等佢整都好煩。
各位業主，你地有無上述問題呢﹖可否建議我應該點做﹖謝謝﹗

我都係搵左詹生睇，我屋企ｄ牆裂晒，但佢話而家唔係外牆滲漏問題，但我樓上係，發展商如果重整樓上既外牆唔好，詹生話怕我個單位都會一樣，佢講已經驗左好多間，有ｄ業主同你的情況一樣！你俾維修紙時有無再同發展商講清楚？佢地有無同你講會搭棚架維修？你既第二同第三項，我都一樣！我ｄ門框有裂紋，要折左再裝過，好大工程！你會搵詹生再驗嗎？

大家好,
我同你們的情況差不多,好鬼煩,但我沒有找驗樓師,只是自己人驗.
已找出32個問題,我想...我們是否買了 "次貨" ...我們買樓是用來住的,不是去玩驗樓遊戲啊!!
其實我們是否可以找消費者委員會幫忙?

2# JCJ

唉﹗好慘呀﹗我交維修紙時已經講得好清楚，已轉述詹生同裝修師傅既意見，佢地當講一家會跟進。
不過過左2日，我見無回覆，於是打多次電話去，搵我個座個負責人，佢話因為好多人要執漏，話要排隊，可能要等2星期，又話可能承建商有第二個解決方法，唔一定用詹生意見﹗
唉﹗都唔知點好﹗吹唔吹佢地快d整﹖
我諗會驗多次樓，我成日都覺得佢地會是是但但，幾百萬樓咁既質素，真係幾失望﹗

3# FK3388


本來買樓係一件好開心既事，而家因為層樓咁既質素，真係令人好鬼煩﹗
咁既質素，我建議你都係搵專業人士驗，有個保障﹗自己驗可能有d隱藏問題會發現唔到﹗不過，驗左而香港興業整番好先得，如果唔係，得個驗字﹗總之就好煩啦﹗

最大的問題都是牆身裂紋太多... (我大房近房近窗台的一邊, 有一裂紋由頂一直裂到窗台邊)
還有牆腳線及電製位接合得不太好..
而每一對門鎖也鬆得有點過份.. (門鎖不應該可以360度移動吧!?)

我屋裹地台傾斜，全屋牆身裂紋很多！厠所最多嚴重問題，連公厠質素到不如！其中個浴缸下面滲水，有好多小問題我都唔講啦。今日再次發現新問題，厠所洗手盆櫃邊滲水落地磚！激到我！點會咁交樓比人，幾百萬樓咁既質素！本來好開心等收樓個日，宜家就煩到爆！

已過了 5 天 交 defect list 的限期, 還可搵專業人士驗樓再交另一張 defect list 嗎 ?
另不知其他新樓盤是否跟我們的差不多(都係咁多問題), 還是好好多?  聽講新鴻基樓質素好, 大家知不知實况是怎樣?

我係自己驗樓,我驚我有啲嘢未發覺得到. 我都想揾個驗樓師再驗!

今天我交了defect list... 佢地都話要等幾個星期!!

真係等佢維修得黎都死得人啦, 現在我主要係想佢維修回所有窗的胶位, 所有的門鎖(不知各位的門鎖有沒有問題, 我全屋的門鎖也非常鬆... 可以360度打轉的..)

牆身的部份已經找了其他人油油, 因為補回保護油的時侯他們也會補回些裂紋..
因為發展商知道大家都會維修.. 所以"爛"樓也照交左先!?